Se la neĝoviro dancas tangon

Buenos Ajreso: Dentklakante centmiloj da homoj en Suda Ameriko devis toleri vintron el la plej fridaj de jardekoj. Sed lunde (laŭ la regiona tempo) la sentita malvarmo kaj la tremado pro frosto subite finiĝis: "Neĝas, neĝas", jubilis la loĝantoj de la urbego Buenos Ajreso nekredeme. Dum horoj la neĝo kiel flokoj ŝvebante falis el vintrogriza ĉielo kaj la urbanoj pri tio estis tute perpleksaj. De 1918 ne plu neĝis en la urbo.

El la frida neĝo sur la kapoto de parkata aŭto iu formis neĝoviron kaj neĝvirinon, kiuj dancis tangon. "Eŭropa urbo" frontpaĝigis tion "Clarin", la plej granda gazeto de la lando. Ĝi tiel envortigis la grandan sopiron de la argentinanoj al la malnova kontinento.

Kio grizigis la hararon al la respondeculoj de la energiaj instancoj, tion la argentinanoj akceptis kun infaneca ĝojo. Kelkaj veturigantoj de aŭtoj, kiuj reveturis en la Nacia festtago en plilongigita semajnfino al Buenos Ajreso, unue pensis, ke la neĝo estas cindro de brulego.La urbobusoj, kutime ĉiam streĉitaj, interrompis sian veturadon, busveturigistoj saltis eksteren kaj provis kapti neĝajn flokojn.

Ĉe la obelisko en la urbocentro, kie kutime piedpilkaj ludoj estas glorataj, stratpromenantoj spontane komencis neĝbulan interbatalon kaj de balkonoj miloj da homoj memorfotis la nekutiman spektaklon.

Sed la frido havas ankaŭ tragikan flankon. Sole en la ĉefurbo je la semajnfino mortis tri senhejmuloj je trofridiĝo. Pli ol cent homoj en Argentino, Urugvajo, Bolivio kaj Peruo fariĝis jam la viktimoj de la fridaj temperaturoj. En Patagonio kaj en la pli altaj regionoj de la montaro Andoj la temperaturoj falis ĝis sub -20 gradojn laŭ Celsio.

Tamen, la plej multaj homoj sufokiĝis endorme je la elflugasoj de defektaj ligno-kaj gasfornoj. La industrio precipe en Argentino ĝemis pri la drasta energiŝparado, kiu estis necesa pro la pli granda energibezono loĝdoma.

Donjo & Cezar
laŭ OVZ kaj aliaj artikoloj